Лидерот Никола Груевски и локалното раководство на ВМРО-ДПМНЕ во Битола, немаат легитимитет да управуваат со партијата, изјавија на прес конференција сегашни и поранешни членови на партијата и побараа оставки.
Прес конфернецијата ја одржаа на улица, пред партиското седиште и рекоа дека настапуваат во името на претседатели на месни кометитети, на голем дел од членството, Унијата на жени и Унијата на млади во Битола. Оставките ги бараат поради лошите резултати на ВМРО-ДПМНE на локалните избори, но и како што велат, лошите политики на Груевски.
„Бараме оставка на општинскиот комитет на ВМРО-ДПМНЕ на Битола, на Извршниот комитет на ВМРО-ДПМНЕ, оставка на претседателот Никола Груевски. Овој општински комитет, во два изборни циклуси , а посебно на локaлните избори 2017, направи најкатастрофални резултати од постоењето на ВМРО-ДПМНЕ . Никола Груевски, се скара со цела меѓународна заедница, односно со амбасадорите на најмоќните земји, како што се Германија и САД, а и откако се скара со сите албански партии, ВМРО-ДПМНЕ е целосно изолирана и во Македонија, а и од целата меѓународна заедница, со што поради неговите лични интерси, доведен е во прашање и опстанокот на партијата“, изјави Никиолче Талевски, член на ВМРО-ДПМНЕ.
Претседателот на ОК на ВМРО-ДПМНЕ во Битола, Борче Димитровски, не сакаше да ги коментира барањата за оставки. Kусо изјави дека секој може да одржи прес конференција на улица и да бара оставка, но, рече дека тоа не е легитимен начин.
Во меѓувреме пак, во Вевчани чeтворицата членови на општинскиот совет од редовите на ВМРО ДПМНЕ денеска поднесоа колективна оставка и најавија дека повеќе нема да учествуваат во работата на советот.
Како што пренесе „Охрид њуз“, тие се решиле на ваков чин во знак на протест против начинот на владеењето на СДСМ и приведувањето на нивниот сопартиец Крсто Мукоски кој заедно со уште петмина пратеници и триесет други лице се товари за тероризам и загрозување на уставниот поредок на земјата за инцидентите во макдонското Собрание што се случија на 27-ми април.
– Како претставници на советничката група на ВМРО ДПМНЕ и коалицијата за Подобра Македонија во Општина Вевчани, сакаме да ја известиме јавноста дека денес на ден 02.12.2017 година, во знак на револт и протест од начинот на владеење на оваа гарнитура предводена од СДСМ, како и последните политички хајки кои што ги спроведуваат врз невини граѓани, а се однесуваат на настаните од 27-ми, со што не враќаат назад 70 години, во времето на Информбирото. Во знак на солидарност со сите жртви на овој тоталитарен режим, денес како советници поднесуваме неотповикливи оставки и ги враќаме мандатите кои што ги добивме од граѓаните на Општина Вевчани, изјавил Јовица Лешоски, советник на ВМРО ДПМНЕ од Вевчани.