Два поништени гола, промашен пенал, но и водство за убедлив пораз на домашната екипа на крајот. Валјадолид загуби од Реал Мадрид со убедливи 1:4 во последниот меч од 27. рунда во шпанска Примера во кој имаше еден куп интересни моменти.
Во 12. минута Рубен Алкараз беше непрецизен од белата точка, во 14. минута и во 19. минута главниот судија ги поништи головите на Серџо Гвардиола поради недозволена позиција меѓутоа публиката на стадионот „Хозе Зорилја“, сепак, дочека да прослави регуларен гол на своите миленици. Го постигна Ануар Мохамед Туами во 29. минута, но радоста траеше кратко.
Пет минути подоцна „кралевите“, преку Рафаел Варан, израмнија на 1:1, резултат со кој се замина на одмор. Продолжението, пак, донесе еднонасочна фудбалска претстава благодарение на двата брзи погодоци на Карим Бензема, најпрво од пенал во 51. минута, а потоа и од игра во 59. минута по асистенција на Тони Крос.
Гостите од „Сантијаго Бернабеу“ во завршницата останаа со фудбалер помалку. Каземиро беше исклучен, откако доби втор жолт картон за задржување на игра меѓутоа Реал Мадрид до крајот успеа и по четврти пат да ја затресе противничката мрежа и да покаже дека може да ги остави проблемите настрана и да се фокусира на обврските на терен. Печат на трите бода стави Лука Модриќ во 85. минута.
Барселона ја задржа предноста од 12 бода на табелата во однос на третопласираниот Реал. Каталонците имаат 63, „кралевите“ – 51, а меѓу вечните фудбалски ривали на Пиринеите е Атлетико Мадрид со 56 бода.
Примера, 27 коло
Валјадолид – Реал Мадрид 1:4
Севилја – Реал Сосиедад 5:2
Леванте – Вилјареал 0:2
Џирона – Валенсија 2:3
Селта – Бетис 0:1
Хетафе – Уеска 2:1
Барселона – Рајо Валјекано 3:1
Атлетико Мадрид – Легањес 1:0
Алавес – Еибар 1:1
Атлетик Билбао – Еспањол 1:1
Табела: Барселона 63, Атлетико Мадрид 56, Реал Мадрид 51, Хетафе 45, Алавес 41, Севилја 40, Валенсија 39, Бетис 39, Реал Сосиедад 35, Еибар 35, Еспањол 34, Атлетик Билбао 34, Легањес 33, Џирона 31, Леванте 30, Валјадолид 26, Вилјареал 26, Селта 25, Рајо Валјекано 23, Уеска 22.