Денеска во 11 часот треба да продолжи седницата на Собранието на која треба да се разреши Републичкиот јавен обвинител Марко Зврлевски. Разрешувањето на Зврлевски е петта точка на дневен ред, а на последната седница во четвртокот пратениците стигнаа до четвртата точка- Извештајот за работата на Народниот правобранител.
Неизвесно е дали и денеска на дневен ред ќе дојде точката за разрешување на Зврлевски, бидејќи во четвртокот пратениците од ВМРО-ДПМНЕ формираа десет пратенички групи.
По оваа постапка на ВМРО-ДПМНЕ, претседателот на Собранието, Талат Џафери го откажа продолжението на седницата во петокот.
Со формирањето на десет пратенички групи, опозицијата има право да бара десет часа пауза во текот на денот, може да бараат прекини на седницата за да им се достават стенографски белешки, сите десет координатори да имаат по 15 минути обраќање, да бараат прекин на пленарната седница за да се одржи седница на комисијата, а кога ќе се гласа за буџетот може да зборуваат сите вкупно пет часа. Формирањето на пратеничките групи е предвидено во собранискиот Деловник, но пратениците и експертите велат дека е спорно од правен аспект.
Џафери во петокот во изјава за медиумите рече дека не сака предвреме да коментира дали пратеничките групи на ВМРО-ДПМНЕ се направени само за да се блокира работата на Законодавниот дом.
Денеска во Собранието ќе се одржат и неколку комисии. Прва седница ќе има и Комисијата за финансирање и буџет, на која треба да се разгледа ебалансот на Буџетот што Владата го направи во петокот, а на Комисијата за изборите и именувањата ќе се бира нов Генерален секретар на Собранието и негови заменици.