По вчерашното сведочење на пратеникот и лидер на Алјансата за Албанците Зијадин Села за насилствата во Собранието на 27 април минатата година, денеска во Кривичниот суд треба да го продолжи судењето на обвинетите за обидот за негово убиство.
Вештаци од Институтот за судска медицина и криминалистика во Скопје денеска ќе треба да го презентираат наодот за повредите кои му биле нанесени на Села. Во судницата треба да се сослушаат и тројцата вештаци.
Села вчера даде исказ за случувањата во Собранието. Кажа дека во прес-салата бил удрен со монитор и со копје од знаме и оти слушал закани упатени кон него дека ќе биде убиен.
Во еден момент бил нападнат од лица од толпата кои го фатиле за глава и го удирале со тупаници, по што изгубил свест.
Последно на што се сеќава е дека паднал на колена, по што почнале да го удираат по главата и телото. Се освестил по два часа во канцеларијата во Собранието, каде што дошла полицијата и итна медицинска помош. Полицајците го маскирале во повреден полицаец и го одвеле во болница.
Во ходникот го сретнал тогашниот министер за здравство Никола Тодоров кој рекол дека треба да биде пренесен во Градска болница, на што се спротиставил докторот кој инсистирал Села да биде пренесен на КАРИЛ. Таму, лекарите констатирале дека бил во животна опасност и имал хеморагија. Како последица на претрпеното на 27 април, Села рече дека и денес прима терапија за болки и за слабо помнење.
Во еден дел од сведочењето, Села говореше дека за цело време од влегувањето, до моментот до кој се сечава, покрај него одела некоја новинарка, чие име не го кажа, која била придружуана од еден од напаѓаќите со фантомка и која му се заканила со зборовите: Ќе видите што ќе ви се случи. Тој рече дека таа цело време го снимала и не му дозволила да излезе, па го упати судот да го разгледа нејзиниот видео материјал.
На претходното рочиште адвокатот на Села побара отштета за својот клиент во висина од 30 милиони денари. Средствата што се бараат како отштета се за материјалните трошоци за лекувањето на Села, како и за претрпената физичка болка, повреда на личниот интегритет и за претрпен страв.
Во овој случај обвинети се Кире и Цејо Ѓорѓиевски, Оливер Ошавковски, Саша Ценков, Николче Димитриевски, Александар Јаневски – Тошта, Андреј Мицов, Никола Војминовски, Коста Делов и Стојан Павловски – Кобра.