„Изминатиов период, во Нова социјалдемократска партија (НСДП) се води битка за иднината на партијата. Дали ќе биде демократска, прогресивна сила на македонската политичка сцена или ќе биде преземена од недемократски структури, навикнати да работат само за своите, лични интереси“, изјави во соопштение до јавноста Кристијан Трајковски од НСДП, кој во моментов е организациски секретар на партијата но се бори за лидерското место против Горан Мисовски, собраниски потпретседател и член на оваа партија.
Трајковски додава дека „на овие структури не им одговараат промени“.
„Ним им пречи гласна и самостојна НСДП, која ќе го продолжи патот со своите коалициски партнери, но ќе биде коректор, наместо апологет на поголемите политички партии. Ним им треба партија која ќе им служи само како гарант за фотелјите во кои се толку долго, што веќе ги сметаат за нивно лично право“, рече Трајковски.
„Нивото на демократскиот развој на секое општество зависи од нивото на внатрешната демократија на партиите. Членството и делегатите на НСДП ќе ги издржат и овие притисоци и закани. Имаме победено многу посилни и помоќни режими и противници“, порача тој пред претстојниот конгрес на Нова социјалдемократска партија, на која ќе се избира наследник на Тито Петковски.
„На 4-ти јуни конгресот на НСДП ќе гласа слободно и демократски. Конгресот ќе гласа за најдобриот кандидат, со најдобрите идеи и програма, за кандидатот ќе ја профилира НСДП во партија на 21-от век, способна да се носи рамо до рамо со најголемите политички сили во Македонија“, се наведува во соопштението на Трајковски.
Претходно Централниот одбор на НСДП го утврди неговиот ривал Горан Мисовски за единствен кандидат за лидерското место на партијата. Досегашниот лидер Петковски рече дека договорот не бил таков и дека Мисовски и неговите приврзаници ја прифатиле неговата кандидатура на нелегитимен начин. (Р.Н.)