Британската влада ќе инвестира 338 милиони фунти за промоција на одење пеш и за изградба на нови велосипедски патеки. Целта е зголемената пандемиска употреба на велосипеди, како превозно средство, да остане трајна, а во насока на напорите за намалување на емисијата на штетни гасови.
Со инвестицијата, што претставува зголемување на буџетот за 30 проценти за активно патување, возењето велосипед и пешачењето ќе станат полесни и побезбедни.
Според владата, во 2020 година километрите поминати со велосипед по англиските патишта се зголемени за 46 отсто.
– Минатата година, милиони од нас откриле дека возењето на велосипед и пешачењето се одлични начини да се остане во форма, да се ублажи застојот на патиштата и да се придонесе за животната средина, изјави британскиот министер за транспорт, Грант Шепс, додавајќи дека кабинетот е решен да го продолжи тој тренд.