Индискиот сој на коронавирусот, за којшто здравствените власти денеска потврдија дека е откриен и во нашата земја, официјално е пријавен на 53 територии, според Светската здравствена организација.
Индиската варијантата Б.1.617 на коронавирусот за првпат се појави лани во октомври во Индија, а во регионот е регистрирана во Грција и Словенија, а во почетокот на јуни и во Хрватска. Поради овој сој, многу земји воведоа ограничувања за патување во Индија. Најголем број заразени со оваа варијанта на вирусот, по Индија, е регистриран во Велика Британија. Овој сој беше откриен и во Унгарија, и тоа кај граѓани кои не патувале надвор од државата.
Министерството за здравство денеска информира дека минатата недела кај еден пациент кој е хоспитализиран во приватна болница, е детектирано присуство на „индиски“ сој на вирусот СарсКов2 и нагласуваат дека „овој пациент не е знак за ризик“.
– Според епидемиолошката анкета која ја направила болницата, пациентот се вратил од Ирак, каде претходно 10 дена бил болен и хоспитализиран, а кога се вратил во земјава, веднаш со посебно санитетско возило бил пренесен во болницата. Состојбата на пациентот е стабилна – соопштуваат од Министерството.
Пред индискиот сој, во земјава стаса и нигерискиот, од којшто во Централноафриканската Република заболе полковник на АРМ, кој, за среќа, по 22 дена лекување на Клиниката за инфективни заболувања, е отпуштен дома.
Инаку, според новиот начин на именување на мутациите на коронавирусот кој СЗО го објави минатата недела, индискиот сој се нарекува Делта.
Оваа варијанта на вирусот, Б.1.617, може да предизвика симптоми како дијареја, болки во стомакот, оштетување на слухот, но и болки во зглобовите.
Поради ширењето на оваа мутација, којашто сега е доминантна во Велика Британија, од 21 јуни најверојатно нема да се укинат дел од рестриктивните мерки во земјата, како што беше предвидено. Дали и во С.Македонија по откривање на оваа мутација, ќе бидат евентуално предложени нови рестриктивни мерки чие натамошно олабавување се најавува за 15 јуни, останува да видиме.
За големиот број мутации на коронавирусот, д-р Ана Глигиќ, вирусолог од Србија на српската телевизија Прва неодамна изјави:
– Ова е нормално за РНК вирусите, веќе се добро познати овие моќни мутации. Тие се всушност жестока борба на вирусот да се задржи меѓу луѓето, тој се обидува да се прилагоди и да остане во природата. Но сите овие мутации ќе наидат на пречка од вакцините, бидејќи сите корона вируси што ги имаме, имаат нешто заедничко. Сите вакцини што досега ги користевме се ефикасни, многу луѓе се вакцинираа, многу се разболеа и оздравеа, создадовме имунитет, што ќе понуди некаква заштита од мутации – изјави д-р Глигиќ.
Таа додаде и дека „вакцините коишто сега се достапни ќе штитат нешто помалку од новите соеви“.
По откривањето на индискиот сој и во Хрватска, д-р Ива Пем Новосел од хрватскиот Завод за јавно здравство, пред неколку дена во емисијата Студио 4, изјави:
– Откриен е пред неколку дена во Сплитско-далматинската жупанија, но тоа се индивидуални случаи и нема причина за паника, изјави таа и додаде дека и понатаму сите треба да бидат претпазливи.
Според СЗО, новите соеви се доста заразни и голема е можноста за нивно брзо пренесување.
Љубица Балабан