Јохан Тарчуловски – водач на „Комитите“, хашки затвореник, пратеник, па кандидат за градоначалник на Кисела Вода.
Со сиот негов „багаж“ од минатото, ВМРО-ДПМНЕ прво го стави на добитно место на парламентарните избори во декември минатата година, а сега за локалните избори на 15 октомври, партијата на Груевски одлучи да го кандидира за градоначалник на Кисела Вода.
Во своите говори на митинзите, на присутните граѓани им се обраќа со „браќа и сестри“, а покрај ветувањата од изборната програма, редовно зборува за патриоти и предавници, со воинствен став дека е дојдено време повторно народот да се сплоти и да остане единствен во одбрана на татковината.
„Јас сум човек кој минал низ радости и тага. Многупати сум се радувал, но многу пати душата ме болела. Сегашната болка е најголема, бидејќи е болка за Македонија. Не ме гледајте како човек на кој му е потребна функција и фотелја. Чувствувајте ме како ваш син, пријател и брат. Како што вели нашиот Петре М. Андреевски, племето наше е пиреј и не го ништи ниту една војска, само малку да се допре до земја и пак ќе оживее, пак ќе потера. Ништо не ја ништи таа трева, ништо не ја ништи Македонија. Да се биде Македонец е света работа , но и проклетство на вечна борба за Македонија“, вели на еден од митинзите Јохан Тарчуловски.
https://www.facebook.com/Johan.Tarculovski/videos/1550531451656557/
Тој неговата програма ја дели на три категории: „Семејството – бескрајна љубов и истрајност“, „Пензионерите – темел на искуството“ и „Младите – иднината на општината“.
Тарчуловски ако биде избран за градоначалник најавува изградба на нови градинки, реконструкција на училишта, зазеленување на општината, активирање на пензионерските клубови, бесплатни обуки за компјутери, 11 октомври – ден на пензионерите, субвенционирање на иновативни проекти за отпочнување на свој бизнис, финасиска подршка во период од 3 години за „старт-ап“ бизниси, посредување при вработување во компаниите од о. Кисела Вода, активирање на младински клубови…
Тарчуловски во кампањата е особено внимателен кон жените од неговата општина, посебно кон неговите сопартијки за кои изјави:
„Голема почит и огромно Благодарам за поддршката која ми ја дава понежниот пол, Унијата на жени на ВМРО-ДПМНЕ“.
Тарчуловски ја потпиша Јавната заложба за унапредување на заштитата на жените и децата жртви на различни форми на насилство. Како иден градоначалник, се обврза да ги заштити и поддржи сите ранливи категории на граѓани и активна соработка со невладиниот сектор.
Во брак е со македонската фолк пејачка Соња Тарчуловска со која имаат две деца. Не изостави во кампањата да ја спомене неговата сопруга, на која и вети дека првото кафе како градоначалник ќе го испие со неа.
„ На барање на ОБСЕ/ОДИХР, остварив средба со постојаните претставници г-дин Хелмут Госер и г-ѓа Маркета Неквиндова…Разговорот го завршивме со тоа што морав да ги разочарам. Побараа од мене заедно да го испиеме првото кафе како градоначалник на Кисела Вода. Сепак, првото кафе ќе го испијам со мојата сопруга, мојата најголема поддршка и љубов. Второто кафе им го ветив нив“, вели Тарчуловски.
Тарчуловски не чувствува одговорност за крвавиот четврток на 27 април
Јохан Тарчуловски член на ВМРО-ДПМНЕ станал уште од самото формирање, а во 1993 бил избран за претседател на УМС на ВМРО-ДПМНЕ за општина Чаир. По победата на ВМРО-ДПМНЕ на изборите во 1998 година стапил во обезбедувањето на премиерот Љубчо Георгиевски, а од 1999 година е телохранител на Претседателот Борис Трајковски.
Во 2005 година Хашкиот трибунал го осуди на 12 години затвор за тешки кривични дела сторени за време на конфликтот во Македонија во 2001 година, во неговото родно село Љуботен. Тој беше осуден за наредување, планирање, поттикнување, помагање или поддржување убиство, смислено уништување градови и села и сурово постапување. Одлежа 8 години и во 2013 година беше ослободен од затворот во Шевенинген и се врати во Македонија.
На последните парламентарни избори во декември 2016 година, Тарчуловски стана дел од пратеничкиот состав на ВМРО-ДПМНЕ. Во неговата биографија пишува дека е дипломиран инженер – агроном на Универзитетот „Гоце Делчев“ во Штип, факултет што го завршил откако од Хаг се вратил во земјава.
Тарчуловски е еден од пратениците на ВМРО-ДПМНЕ кој на безбедносните снимки на крвавиот 27 април во Собранието, беше забележан како ги насочува насилниците кон салата каде беа пратениците од СДСМ. Тој подоцна изјави дека не чувствува никаква одговорност за случувањата на крвавиот четврток.