Заврши соработката меѓу Работнички и Ѓоре Јовановски. Четирикратниот македонски фудбалски првак и поранешниот селектор, како што наведуваат од Градски парк, се договорија за спогодбен раскин на договорот поради лошите резултати на дебармаалци во домашното првенство што воопшто не коинцидираат со амбициите на клубот.
„Во разговор со Јовановски се договоривме за спогодбен раскин на соработката. Резултатите во фудбалот секогаш се тие што ги диктираат настаните. Амбициите на Работнички се високи, а резултатите во моментот се под таквото ниво, па затоа и дојде до раскинување на договорот. Би сакал да се заблагодарам за стореното досега. Додека беше тренер ги демонстрира своите професионални и човечки квалитети, максимално се посвети и на младинската школа и му посакувам се најдобро во натамошната кариера“, истакна Драган Поповски по разделбата со Ѓоре Јовановски.
По девет одиграни кола во домашниот шампионат, екипата на Работнички е на шестото место на табелата со скор од три победи, две реми и четири порази. Нареден ривал на „црвените“ е Ренова. Тимот од Градски парк воедно е четвртфиналист во Купот на Македонија. Во осминафиналето го елиминира Тиквеш, а за полуфинале ќе игра двомеч со Македонија Ѓорче Петров.