Александар Тодоров е нов селектор на македонската машка кошаркарска репрезентација. Наследникот на Јорданчо Давитков беше промовиран претпладнево во Кошаркарската федерација на Северна Македонија (КФСМ), а негов асистент во стручниот штаб ќе биде Ѓорѓи Кочов, актуелен тренер на МЗТ Скопје Аеродром. Целта што е поставена пред нив се однесува на пласман на Европското првенство во 2021 година. Во тој контекст и најавеното подмладување на националниот тим во пресрет на продолжението на квалификациите.
„Имаме неколку млади играчи и во домашната сцена и во странските првенства кои се успешни во своите клубови и тие ќе добијат шанса. Но, сакам да нагласам дека подмладувањето не сакам да звучи како алиби, туку потреба да се даде шанса на тие деца кои за неколку години ќе бидат основниот костур на репрезентацијата“, истакна Тодоров.
Првиот собир во пресрет на февруарските средби со Естонија на домашен терен (20 февруари) и со Русија на гости (23 февруари) е закажан за 12 февруари, а селекторот Тодоров веќе добил потврда за присуство на 15-ина играчи од вкупно 24 колку што се наоѓаат на неговиот список. Договорот на Тодоров со КФСМ, во случај на пласман на ЕП 2021, е со важност до 2025 година.
„Ако гледаме од спортски, од копшаркарски аспект, нашата шанса е Естонија, ако, пак, гледаме неспортски, за ние да одиме директно на ЕП треба Русија да не добие право за настап. Но, знаејќи колку јас имам среќа, тоа нема да се случи што значи ќе мора преку натпревари да ја оствариме целта. Сепак не значи дека ќе биде доволно подобар биланс со Естонија во двата меѓусебни дуела, бидејќи можни се изненадувања и на средбите со другите два противника“, додаде Тодоров.
За Тодоров ова е прв селекторски ангажман во кариерата во која смени неколку клупски средини. Во домашната сцена ги водеше Акумина, МЗТ Скопје, Куманово, Вардар, ФОН Универзитет додека во странство беше тренер на Чукурова Јуниверзити (Турција), Рилски спортист (Бугарија), Балкан Ботевград (Бугарија), Динамо Букурешт (Романија), Пеќ (Косово), Левски Софија (Бугарија) и Крајова (Романија).