Денот на независноста 8. Септември годинава ќе се одбележи под мотото „Заедно одиме напред“, а прославата ќе биде во дворот на Владата.
Прославата ќе започне во 18 часот, каде ќе се обрати премиерот Зоран Заев. Ќе настапат Макеоднската филхармонија со песни на познатиот американски диџеј и автор Хуан Аткинс. Ќе настапи и македонскиот диџеј Огнен Узунов.
Влезот е слободен и можат да присуствуват сите граѓани.
Од Владата засега не можат да потврдат дали и германската канцеларка Ангела Меркел, која в сабота ќе биде во Скопје, ќе присуствува на прославата, бидејќи нејзината агенда се уште не е утврдена.
Оттаму исто така додаваат дека посетата на германската канцеларка која се совпаѓа со Денот на независноста е само по себе „голем симболичен гест“.
Вечерва во Скопје пристигнува генералниот секретар на НАТО Јенс Столтенберг, кој работниот дел од престојот ќе го започне утре, со посета на Општината Гази Баба, а потоа ќе присуствува на показна вежба во касарната „Илинден“, по што ќе има прес конференција со министерката за одбрана Радмила Шекеринска.
Средбата со премиерот Заев е планирана да се одржи попладнето во Клубот на пратениците.
Според агендата од прес-службата на НАТО, Столтенберг во Скопје ќе се сретне и со македонскиот претседател Ѓорге Иванов и со претседателот на Собранието Талат Џафери.
Утре (6 септември) во Скопје ќе пристигне и автрискиот премиер Себастијан Курц, кој според агендата исто така треба да биде во земјава на Денот на независноста.
Посетата на високи странски гости ќе ја заокружи Ангела Меркел, за која е потврдено дека пристигнува на 8 септември, но тајмингот на средбите се уште не се соопштува.
-Во една година првпат ни се случува генерален секртетар на НАТО да ја посети нашата земја која се уште не е членка на Алијансата. Во само два дена ќе ги имаме канцеларите на Австрија и Германија во посета на Македонија. Тоа покажува дека светот навистина го цени тоа што се случува во Република Македонија и дава силна поддршка на нашите две стратешки цели членство во ЕУ и НАТО, рече денеска министерката за одбрана Шекеринска.