Неколку здруженија и организации што отворено се противат за британското истапување од Европската Унија (ЕУ) за денеска најавија марш низ улиците на Лондон со барање за распишување на повторен референдум за Брегзит.
Предвидено е демонстрантите да минат пред Кабинетот на британската премиерка, Тереза Меј и да го завршат маршот пред зградата на Парламентот во Вестминстер.
Еден од организаторите на маршот, директорот на кампањата „Глас на народот“, Џејмс Мекгрори изјави дека движењето што се залага за повторно изјаснување на граѓаните за Брегзит во моментот е „најголемо масовно движење во Велика Британија“.
Организаторите на денешниот марш се надеваат дека според бројноста ќе го надминат досега најголемиот собир на противниците на Брегзит, што се одржа лани во октомври и на кој присуствуваа околу 700.000 лица.
Тие ангажираа над 200 автобуси од цела Велика Британија за превоз на учесниците на маршот во Лондон.
Во меѓувреме, иницијаторите на петицијата за отфрлање на Брегзит соопштија дека за само три дена собрале четири милиони потписи.