Австралиската полиција уапси стотици демонстранти кои протестираа против новите „затворања“ во Мелбурн и во Сиднеј, а во судирите се повредени седум полицајци.
Полициската коњица употреби и бибер спреј во Мелбурн за да растера толпа од околу 4.000 луѓе кои се втурнаа кон кордонот, додека во Сиднеј помалите групи беа спречени да се спојат.
Полицијата во австралиската држава Викторија соопшти дека во Мелбурн се уапсени 218 лица и се изречени 236 казни, додека три лица се задржани во притвор поради напад врз полицајци. Уапсените се соочуваат со казни од 3.900 долари за кршење на забраната за јавни собири.
Полицијата на Нов Јужен Велс, чиј главен град е Сиднеј, соопшти дека 47 лица се обвинети за нарушување на јавниот ред и мир или пружање отпор при апсење, како и дека се изречени над 260 казни во износ од 35 до 3.000 долари. Според полицијата, околу 250 луѓе успеале да влезат во градот за да протестираат.
Од почетокот на пандемијата во Австралија, нешто повеќе од 43.000 луѓе се заразени со коронавирусот, а 978 починаа, што е релативно ниска стапка во споредба со другите развиени земји.