Неколку илјади активисти на организациите за заштита на животната средина денеска одржаа протест во Бон, во пресрет на Светскиот самит за климата, што ќе се одржи од 6 до 17 ноември во главниот град на некогашна Западна Германија.
Учесниците на протестот побараа реализирање на договорените планови за намалување на емисиите на штетни гасови и за затворање на термоцентралите што работат на јаглен.
– Владите и државите, пред се германската Влада, не сторија доволно за да го остварат предвиденото. Тоа е единствено можно ако престанеме да го користиме јагленот. Затоа се собравме околку оваа фабрика за јаглен, за да го запреме уништувањето на животната средина таму каде што тоа и почнува- изјави една од учесничките на протестот.
Учесниците на протестот носеа повеќе транспаренти меѓу кои и „Револуција, не загадување“, „Трамп: Климатски геноцид“ и „Подалеку од нашата земја“.
Според организаторите, на собирот присуствувале над 25.000 лица, додека според германската полиција, на протестот имало околу 10.000 еколошки активисти.