–Уставниот суд денес покажа знаци на живот. Но тоа не е доволно! Продолжуваме да протестираме до исполнување на барањата. Ова го напишаа од движењето #Протестирам на фејсбук, откако уставните судии денеска едногласно изгласаа времена мерка за запирање на сите изборни дејствија кои произлегуваат од оспорената одлука за распуштање на Парламентот.
Денеска во 18 часот почнува протестот во Скопје пред Специјалното јавно обвинителство. Час подоцна во 19 часот почнуваат протестите во Тетово, пред Основениот суд, во Битола на плоштадoт Магнолија, во Радовиш во 19 на плоштадот Свети Спасо Радовишки, во Неготино пред полициската станица во 18 часот и во Прилеп кај камената бина. Во Гевгелија денешниот протест почнува во 19.30, пред Пензионерски дом.
Граѓаните кои еден месец протестираат на улиците во повеќе градови во земјава . Обединети под движењето #Протестирам бараат повлекување на одлуката за аболиција и оставка на претседателот Ѓорѓе Иванов, формирање на специјално одделение на Кривичниот суд за предметите на Специјалното јавно обвинителство, како и повлекување на одлуката за одржување на парламентарни избори на 5 јуни. Дел од барањата се и вклучување на граѓанското општество во решавање на кризата и формирање на преодна влада.