Координаторот на пратеничката група на ДУИ Ејуп Аљими обвинет и неговиот сопартиец Исмет Гури на 16 март ќе се соочат со обвинението за уништување изборен материјал за локалните избори 2013.
Ова се првите функционери на ДУИ обвинети во случајот „Титаник 3“ на Специјалното јавно обвинителство.
Судењето вчера го закажа судијката Оља Ристова.
Ова е прв предмет на тимот на Јанева во кој им се суди на функционери од ДУИ. Претходно Судот им ги одзеде пасошите, па тие се жалеа до Апелациониот суд.
Обвинителката од СЈО Фатиме Фетаи бараше притвор за двајцата обвинети, поради влијание и заплашување на сведоците, но Кривичниот и Апелациониот суд Скопје одлучија тие да се бранат од слобода.
Според СЈО, тогашниот секретар на Општинската комисија Чаир Исмет Гури и Ејуп Аљими, кој во тоа време бил невработен, кривичните дела ги извршиле по првиот круг гласање за избор на градоначалник на општина Чаир, во март 2013. Гури како службено лице во врска со изборите и гласањето и Аљими заедно со други сведоци преправиле над 30 записници за гласање, сумирање и утврдување на резултати од гласањето од повеќе избирачки места. Додавале и одземале гласови кај и стигнат и колку ќе им текне, па на крај самите ги потпишале преправаните резултати.
Со тоа доверливите документи станале неупотребливи, а по алармот во Државната изборна комисија дека нешто не е во ред со гласањето во првиот круг во Чаир, било извршено прегласување.