Скара во дворови и на тераси, месарите со полни раце работа, а граѓаните со маски на лицата се штитеа да не се заразат од ковид-19 кој оваа година му даде посебен белег на 1 мај, Меѓународниот Ден на трудот кој, покрај протестите за работничките права, народот е навикнат да го одбележува со прошетки во природа и дружење по излетнички места.
Мерката „полициски час“ што почна во 14 часот, го диктираше темпото на денот чии вообичаени активности беа поместени за неколку часа порано. Оние кои имаа можност, го искористија утрото за прошетка, додека пак другите по дворови распалија огнови на кои печеа првомајската скара, а чад можеше да се забележи и по терасите на зградите.
„Оваа година ја дигитализираме револуцијата со дигитален синдикален марш 2020. Се бориме за заедништво, еднаквост и солидарност“, се вели во честитката на ССМ.
Вкупно 214 пријави се регистрирани во последниве шест месеци кои опфатиле повеќе 3.000 работнички и работници, над 461 работник останале без работа, а на 696 работници им била намалена платата или, пак, воопшто не им била исплатена. Ова го објави Хелсиншкиот комитет, кој по повод Меѓународниот ден на трудот – 1 мај наведе неколку барања до Владата кои се однесуваат на заштита на работниците.
„Во овие исклучително непредвидливи и тешки времиња, останувањето без плата за најголем дел од работниците значи ризик за нивната гола егзистенција и затоа се потребни солидарноста и заедништвото“, порачаа од Хелсиншки.
Владата вчера, по повод денот на трудот, ја имени Уредбата за финансиска поддршка за плати преку која на работодавачите кои ќе користат финансиска поддршка за исплата на плати им наложува дека не смеат да го намалат бројот на вработени во април, како и два месеца по завршување на мерката, односно заклучно со јули.
Покрај ова, донесено е дополнување и на Уредбата за примена на Законот за работните односи за време на вонредна состојба со кое се овозможува ретроактивно вработување на лицата на кои работниот однос им престанал во периодот од 11 март до 30 април и соодветно нивно пријавување во системот на задолжително социјално осигурување.
Работодавачите кои ќе се согласат на ретроактивно вработување на лицата на кои им престанал работниот однос, тоа ќе можат да го направат до 7 мај и на тој начин да ги исполнат критериумите за стекнување со правото на користење на мерката за финансиска поддршка за исплата на платите за април и мај.
ССМ веднаш излезе со соопштение во кое таквата владина одлука ја нарече првомајска победа. Социјалниот дијалог што го води ССМ со Владата и аргументираните барања даваат резултати, истакнува ССМ.
„Првомајска победа на ССМ. Стоп за можноста за отпуштање на работници. Ги враќаме назад отпуштените работници од почетокот на кризата“, пишува во соопштението од ССМ.