Ремито на Аргентина со Унгарија (25:25) е ништо во споредба со сензацијата што ја приреди Чиле на Светското ракометно првенство во Германија и во Данска. Претставникот на Јужна Америка, кој важи за тотален аутсајдер на турнирот, приреди чудо со убедливиот триумф над Австрија со 32:24 (полувреме 14:15) во второто коло од групата Ц во Хернинг.
Потценувачкиот однос и веројатно веќе вкалкулираната победа се удри од глава на австриските ракометари. На одмор заминаа со гол позитива, но второто полувреме беа ставени под целосно контрола на противникот и во подредена улога. Чилеанците се размавнаа што резултираше со 18:9 по паузата за први бодови на мундијалот и отворање на вратите кон главната група фаза.
Паралелно со натпреварот во Хернинг, ракомет се играше и во Берлин каде Русија во првиот меч од денешната програмата во групата А ја поразија Кореја со 34:27.