Рускиот претседател Владимир Путин денеска телефонски разговарал со својот француски колега Емануел Макрон за војната во Украина, како и за ситуацијата на Блискиот Исток во контекст на иранско-израелскиот конфликт и американските напади врз иранските објекти, соопшти Кремљ.
Како што е наведено, Путин во разговорот рекол дека украинскиот конфликт е директна последица на политиките на западните земји.
Украинскиот конфликт е директна последица на политиката на западните земји, кои со години ги игнорираа безбедносните интереси на Русија, создадоа антируско упориште во Украина и го толерираа кршењето на правата на рускојазичните граѓани, рекол Путин, според Кремљ.
Путин оценил дека решението во Украина треба да биде сеопфатно, да ги отстрани коренските причини и да се базира на реалноста на теренот.
Западните земји водат политика на продолжување на воените операции, хранејќи го режимот во Кијив со разни современи оружја, нагласи, рускиот лидер, пренесуваат агенциите повикуваќи се на соопштение од Москва.
Наводно Путин и Макрон ја истакнале важноста од почитување на правото на Иран на мирна нуклеарна енергија и исполнување на неговите обврски според Договорот за неширење, вклучително и соработката со Меѓународната агенција за атомска енергија (МААЕ).
Според руската страна, претседателите на Русија и Франција се обврзале да ја решаваат кризата околу Иран и другите конфликти во регионот преку дипломатија.
Тие, наводно, се согласиле да продолжат со контактите за можна координација на ставовите за решавање на проблемите на Блискиот Исток.
Во разговорот особено била нагласена одговорноста на Русија и нса Франција како постојани членки на Советот за безбедност на ОН во зачувувањето на мирот и безбедноста.
Изворот на содржината на разговорот е Кремљ.