На московскиот Црвен плоштад започна воедната парада по повод 77 години од победата над нацистичка Германија. Свое обраќање пред присутните имаше рускиот претседател Владимир Путин.
„Наша должност е да го чуваме споменот на оние поради кои сме победници и да не повториме глобална војна. Во претходните години се обидовме да ги одржиме мировните договори, но тие не сакаа да не слушаат. Тие имаа сосема друг план, сега го гледаме. НАТО активно оди кон нашата територија, тое е апсолутно неприфатливо. НАТО работи со украинските нацисти, Украина го добива најмодерното оружје. Одлуката за специјална воена операција беше единствената правилна“, рече Путин.
Путин зборуваше и за русофобија. Тој тврдеше дека на некои американски ветерани им е забрането да дојдат на Денот на победата, иако, како што вели, сакале да дојдат. Тој рече и дека населението во Донбас поддржано од Русија се бори за своите семејства.
Говорот беше прекинат со едноминутно молчење. Путин им посака брзо закрепнување на сите ранети војници и му се заблагодари на медицинскиот персонал.
Спротивно на одредени очекувања, Путин не го спомена зборот „војна“ говорејќи за нападот на Русија врз Украина кој Русија и понатаму го нарекува „специјална воена операција“.