Светската здравствена организација би можела да го забрза признавањето на новите вакцини против Ковид 19, реагира рускиот претседател Владимир Путин.

„Во азиско-пацифичкиот регион и воопшто во светот, сè уште има бројни социо-економски и други проблеми за кои веќе зборувавте, а корона вирусот е далеку од поразен. Не е исклучена појавата на нови и уште поопасни видови на таа инфекција“, рече Путин, говорејќи на онлајн самитот на форумот „Азиско-пацифичка соработка“.

Истовремено, тој повика на взаемно признавање на вакцините и сертификатите за вакцинација против коронавирус во светот што е можно поскоро, потсетувајќи дека Русија таа иницијатива ја претстави на неодамна одржаниот самит на Г20.

„Сигурен сум дека колку побрзо тоа се направи, толку полесно ќе биде целосно обновување на глобалниот бизнис, туризмот и другите активности.

„Нашата земја ќе продолжи да им помага на сите земји на кои им е потребна со испорака на вакцини, лекови, опрема, тестови, опрема за лична заштита“, прецизира Путин.

Во таа насока, рускиот лидер истакна дека Светската здравствена организација може да ги забрза процедурите за проценка на квалитетот и безбедноста на вакцините против коронавирусот, што ќе придонесе за меѓусебно признавање на сертификатите, притоа нагласувајќи  дека активностите на СЗО заслужуваат секаква поддршка, а чекорите кои го нарушуваат прерогативот на СЗО се неприфатливи.