Рускиот претседател Владимир Путин денеска изјави дека политичкиот притисок и санкциите на Западот ги туркаат Русија и Белорусија да го забрзаат процесот на обединување.

„Невидените политички и социјални притисоци од таканаречениот колективен Запад нè туркаат да го забрзаме процесот на обединување“, рече Путин во обраќањето на форумот Русија-Белорусија.

Во 1997 година, двата словенски соседи склучија Договор за Унијата, кој беше дизајниран да врати некои од блиските врски од минатото, прекинати со распадот на Советскиот Сојуз.

Но, со текот на годините, колку повеќе растеше економската зависност на Белорусија од нејзиниот многу поголем и побогат сосед, толку повеќе опаѓаше ентузијазмот на белорускиот автократски претседател Александар Лукашенко за политичка интеграција.

Кон крајот на 2020 година, тој дополнително падна во прегратката на Москва откако Путин му ја даде потребната политичка и финансиска помош додека го задушуваше бранот антивладини протести предизвикани од претседателските избори кои опозицијата ги нарече наместени.

Во февруари, Лукашенко и дозволи на Москва да ја користи Белорусија како полигон за некои од руските оклопни колони кои го нападнаа јужниот сосед на Белорусија, Украина.

Минатата недела рускиот министер за одбрана Сергеј Шојгу рече дека двете земји треба да преземат итни заеднички мерки за зголемување на одбранбениот капацитет и борбената способност на нивните армии.

Според Договорот за Унијата, двете земји остануваат суверени, но нивните граѓани имаат право на престој и државјанство во другата земја.

Иако унијата промовира економска интеграција и гарантира заедничка одбрана во случај на напад, пред околу 20 години напорите да се создаде единствена валута наиде на пречка.