Фирми од Скопје, од Тетово, од Гостивар, од Струга и други места земале финансиска поддршка од државата за исплата на плати на вработените, но не ја исплатиле на работниците, покажа анализата на Управата за јавни приходи (УЈП), институција преку која се спроведуваше мерката за поддршка од последиците од корона-кризата, а со цел да се задржат работните места.
Како што соопшти директорката на Управата за јавни приходи (УЈП), Сања Лукаревска на денешната прес-конференција, станува збор за 281 работодавач кои во април примиле поддршка во износ од 9.995.565 милиони денари, меѓутоа не ја исполниле обврската за исплата на плата за 722 вработени и 427 компании во мај воопшто не исплатиле плата за 984 вработени, иако добиле финансиска поддршка во износ од 13,698,998 милиони денари.
Како што истакна Лукаревска, од направената анализа е утврдено дека 120 даночни обврзници кои добиле финансиска поддршка не исплатиле плата за своите вработени и за месец април и за месец мај, а осум даночни обврзници исплатиле помалку плата за двата месеца.
Од оние што не исплатиле плати на работниците во април се 62 фирми од дејноста трговија, 43 фирми од дејноста подготовка на оброци и служење храна, 17 фирми од градежниот сектор. Меѓу фирмите кои не исплатиле плата на вработените во април, а добиле финансиска поддршка имало и од дејноста производство на облека, трговци на мало и големо, емитување програма, објекти за сместување и слично. Најголем дел од фирмите се од Скопје – 84, потоа Тетово – 38, Гостивар – 23, Струга – 20 и Куманово – 16.
Лукаревска потенцира дека 76 даночни обврзници, за дел од своите вработени побарале финансиска поддршка преку конечна пресметка, а за дел со исправка и за 1.121 вработен примиле финансиска поддршка во износ од 15.111.700 милиони денари, но не извршиле исплата на износот на плата по поднесените исправки во вкупен износ од 172.790 денари. Овие компании се од дејностите градежништво, производство на мебел, транспорт, објекти за сместување, производство и сл., а најголем дел се од Тетово – 27, од Гостивар – 11 и од Скопје – 5.
„За месец април, 1.930 работодавачи кои примиле финансиска поддршка за 26.875 лица имаат извршено задржување на средства од плата во вкупен износ од 49.340.606 милиони денари“, рече Лукаревска и најави дека податоците за овие компании ќе се достават до Министерството за труд и социјална политика за да се утврди дали задржаните средства се основани или не.
Преку оваа мерка за април, на 19.780 работодавачи е исплатено вкупно 1.793.207. 630 денари милијарди денари за вкупно 128.315. Финансиска поддршка за мај, пак, добиле 19.938 работодавачи во вкупен износ од 1.666.373.597 милијарди денари за вкупно 119.182 вработени.
Од оние кои не исплатиле плата за 984 вработени во мај се 84 фирми од дејноста трговија на мало, 66 фирми од дејноста подготовка на оброци и служење на храна, 35 фирми од транспорт, осум фирми од нискоградба, а меѓу овие се и фирми од градежниот сектор, од производство, од трговија на големо и мало, од емитување програма и слично. Според анализата, фирмите што не исплатиле плата во мај се 110 од Скопје, 61 од Тетово, 34 од Гостивар, 28 од Струга, 21 од Куманово, 15 од Битола и 10 од Струмица.
И во мај, како што рече директорката на УЈП, 34 даночни обврзници кои за дел од своите вработени побарале финансиска поддршка преку конечна пресметка, а за дел со исправка, примиле износ од 13.218.438 милиони денари за 913 вработени, меѓутоа не извршиле плаќање на износ од 102.593 денари од поднесените исправки. Станува збор за фирми од дејноста градежништво, од образование, од подготовка на оброци и служење на храна, од транспорт, од објекти за сместување, од производство и сл.. Пет од нив се лоцирани во Скопје, три во Тетово и по една во другите градови.
„За месец мај, 1.816 работодавачи кои примиле финансиска поддршка за 25.590 лица, имаат извршено задржување на средства од плата во вкупен износ од 40.069.247 милиони денари. Податоците за овие компании, како и за месец април, ќе се достават до Министерството за труд и социјална политика за да може да се утврди дали задржаните средства од плата се основани или не“, посочи директорката.
Таа додаде дека на работодавачите кои користеле финансиска поддршка, а не извршиле исплата на плата доставени им се опомени за неисплатена плата и доколку не извршат исплата во определениот рок, ќе следи спроведување на постапка на присилна наплата на платата. Дополнително, додаде, Законот за придонеси од задолжително социјално осигурување во ваков случај предвидува изрекување на глоба за сторен прекршок, а работодавачот ќе биде задолжен да ги врати добиените финансиски средства во целост, заедно со камата, во спроведена постапка на УЈП во соработка со Државниот инспекторат за труд.
„Управата за јавни приходи, располага со детални податоци за искористеноста на финансиската поддршка и будно ја следи состојбата на искористеност на мерките, но и почитување на обврските од законот. Податоците за компаниите кои примиле финансиска поддршка, а не ја исполниле обврската за исплата на платата ќе бидат доставени до Генералниот секретаријат на Владата како носител на мерката и исплатувач на финансиската поддршка од каде истите ќе може да бидат и јавно објавени“, рече Лукаревска.
Апелираше до сите работодавачи да ги користат правата од Уредбата за финансиска поддршка, но и да ги почитуваат обврските утврдени во оваа уредба, Законот за придонеси од задолжително осигурување и Законот за работни односи.
„Апелирам до сите работодавачи што не ја испочитувале оваа законска одредба да го направат тоа кон своите вработени, бидејќи целта беше да се зачуваат работните места, а не парите да ги земат работодавачите. Да го направат тоа пред да бидат јавно објавени“, истакна Лукаревска.
Таа појасни дека рокот за исплата е поминат, но, сепак, ова законско право треба да го остварат работниците. Управата за јавни приходи дополнително ќе соопшти податоци од анализата за спроведување на мерката за јуни, месец за кој е дадена финансиска поддршка на 17.905 компании во износ од 1.404.470.647 милијарди денари за вкупно 101.148 вработени.