Првиот тренинг без Столе Димитриевски, без Стефан Ристовски и без Езџан Алиоски, но затоа со Адис Јаховиќ. Фудбалската репрезентација на Македонија се собра во Скопје и ги почна подготовките за завршните мечеви во квалификациите за Светското првенство во 2018 година против Италија на 6 октомври во Торино и против Лихтенштајн три дена подоцна во Струмица.
Голманот на Гимнастик Тарагона, офанзивниот десен бек на лисабонски Спортинг и крилниот напаѓач на Лидс јунајтед почнуваат со работа од утре. Дополнителниот повик за играчот на Гезтепе и прв стрелец во турскиот шампионат доаѓа по повредата на вардарецот Бобан Николов.
„Пред нас е меч со репрезентацијата со најдобра одбрана во светот. Но, и ние имаме добри напаѓачи. Го покажавме тоа на првиот меч во Скопје, се надеваме дека овојпат и среќата ќе биде со нас. Со нетрпение чекавме да се собереме и не се собравме со чувство за екскурзија туку за позитивни резултати против Италија и против Лихтенштајн“, порачува Марјан Радески од Шкендија.
Македонија остави симпатичен впечаток во досегашните осум настапи во циклусот и покрај двете победи и ремито. Остана без бод во Скадар против Албанија во завршницата, го освои во Струмица, славеше на гости против Лихтенштајн и Израел, против Израелците во Скопје не реализира пенал за 2:2 во петтата минута од судиското продолжение. Не потфрли ниту во поразите од Шпанија и Италија, а новиот дух што А тимот го доби во младите фудбалери од Полска со право даваат надеж за, барем, надигрување со „азурите“ во петок и напад на трите бода со фенерџијата во групата во понеделник во последните 180 минути од квалификациите за СП 2018.
„Знаеме каде ќе патуваме и кому ќе гостуваме. Италијанците се четирикратни светски прваци. Нивната селекција е одлично поткована на тактички план за што се мајстори. Досега покажавме дека можеме да се носиме со силни репрезентации, мора максимално да се заложиме и овојпат“, коментира селекторот Игор Ангеловски.
Националниот тим до среда претпладне ќе биде во Скопје, на пат кон Торино ќе тргне околу 10,30 часот и по пристугнувањето ќе одработи два тренинга до мечот во петок од 20,45 часот. Шпанија во истиот термин во Аликанте ја пречекува Албанија, а Лихтенштајн во Вадуц ќе игра со Израел.