Шпанскиот премиер Мариано Рахој не и е лут само на Каталонија. Неделава се налути и на Белгија.
Причината се изјавите на белгискиот премиер за каталонската криза. Шарл Мишел го налути шпанскиот колега со две изјави. Првата беше на денот на гласањето во Каталонија на 1 октомври кога Мадрид прати полиција во Каталонија за да го спречи одржувањето на референдумот за независност.
Мишел на Твитер остро го осуди насилството на шпанската полиција што не му се допадна на Рахој. Освен тоа, Мишел беше првиот премиер (а и единствениот) од ЕУ што јасно го осуди насилството.
Првиот пат Рахој се воздржа од коментар. Но втората изјава на Мишел не помина без реакција и тоа брза и остра.
Во интервју за белгиските медиуми Мишел рече дека “каталонската криза не е правна (како што тврди Мадрид) туку политичка”. Мишел испрати порака и до Мадрид и до Барселона повикувајќи ги да седнат на дијалог.
А шпанската Влада изјави дека е “непријатно изненадена” од “нападите” што доаѓаат од земја партнер.
Белгискиот дневник “Het Laatste Nieuws” ја објави денес дипломатската размена на писма помеѓу Мадрид и Брисел.
Амбасадорот на Белгија во Мадрид бил повикан кај шпанскиот премиер каде што му било речено дека изјавите на премиерот се неприфатливи, Белгија не смее на исто рамниште да ги става Мадрид и регионот Каталонија а шпанската влада е изненадена што се уште не слушнала Белгија да ја повика Каталонија да го почитува шпанскиот Устав.
И тоа не е се. Мадрид и се закани на Белгија велејќи дека ваквото однесување нема да остане без последици. Според медиумите во Белгија, заканата се однесува на кандидатурата на една Белгијка за директорското место во Европол. Кандидатура што Мадрид нема да ја поддржи.
И покрај тоа што зборовите на Белгиецот Мишел го налутија неговиот шпански колега, белгискиот премиер нема намера да се извини или да ја повлече својата изјава:
“Нема никаков иницидент туку само медиумско драматизирање врз основа на изјава што сум ја дал и на која целосно стојам”, изјави тој за белгиските медиуми денес. И додаде дека ако има некаков проблем Рахој “го има мојот телефонски број”.
За Белгија, регионалните барања за независност не се ништо ново. Во регионот Фландрија сепаратистите веќе 30 години бараат независност па белгиските политичари знаат колку се важни дијалогот и политичкиот консензус а колку може да биде контрапродуктивно насилството.