Повторното воспоставување на „нормалната ситуација на легалност“ во североисточната покраина Каталонија претставува еден од приоритетите на шпанската Влада, изјави премиерот Маријано Рахој.
Тој пред Парламентот рече дека централната Влада, со воведувањето на директна управа, сака да избегне дополнителна економска штета за Каталонија по иницијативата за нејзино осамостојување.
Според него, примената на членот 155 од Уставот е „единствена можна“ опција за воспоставување на владеењето на правото, која, според него е укината со обидот за сецесија на каталонскиот лидер Карлес Пучдемон.
Тој се надева дека траењето на овие планирани мерки, меѓу кои и смената на владата на Пучдемон и одземање на овластувањата на каталонскиот парламент ќе биде кратко, и дека тие би требало да завршат со регионални избори. Рахој се надева исто така дека изборите ќе бидат одржани што е можно побрзо откако ќе бидат воспоставени ред и закон.
-Со активирање на членот 155 од Уставот ја исполнувам мојата обврска во однос на непочитувањето на законот, изјави Рахој.
Тој додаде дека целта е „отстранување на економските последици“.
Според неговите зборови, „единствена работа за која Пучдемон сакал да разговара се условите и роковите за независност на Каталонија“.
Над илјада компании ги префрлија своите правни седишта од Каталонија за да избегнат проблеми поради несигурноста која настана по одржувањето на референдумот.
Каталонија од петок би можела да се најде под директна управа на власта во Мадрид, поради одржување на референдумот за независност на шпанската покраина.
Горниот дом на шпанскиот Парламент во петок би требало да и одобри на Владата да ги искористи специјалните овластувања.
Заменичката на шпанскиот премиер Сораја де Сантамарија претходно изјави дека регионалниот лидер на Каталонија Пучдемон ќе ги изгуби овластувањата и ќе престане да прима плата откако шпанскиот Сенат ќе го усвои членот 155, со кој централната Влада во Мадрид ја премеа контролата над покраината.
Шпанскиот суд оцени дека референдумот за независност што го организираше регионалната влада на Каталонија е кршење на шпанскиот Устав од 1978 година.