Норвешка докажа дека е светска велесила во женскиот ракомет со освојување на седмиот континентален трофеј. Холандија имаше желба и мотив, но во клучните моменти од натпреварот во вториот дел дозволи Норвешка да поведе и со пет погодоци разлика, за на крај во неизвесен финиш да ја загуби титулата. По означување на крајот на семафорот остана запишан финалниот резултат 29-30.

Норвежанките го одиграа десеттото финале, а првпат против Холандија која го освои првиот медал на ЕП по сребрените одличја на СП и на Олимпијадите.

Победникот го реши искуството на Норвежанките. Холандија пружи отпор, многу поголем и посилен од минатогодишното финале на Светското првенство и најави дека во годините што следуваат ќе биде сериозен ривал на Норвешка.

Холанѓанките први создадоа значителна предност (9:13) во 22. минута во моменти кога блескаше голманката Вестер. Имаа и три напади за дополнително зголемување на предноста што поради технички грешки не ги реализираа, па ѝ овозможија на Норвешка, до крајот на полувемето, со серија од 6:2 да израмни на 15:15.

Израмнето започна и вториот дел се до 42.минута, кога во серија влезе норвешката голманка Гримсбо. Нејзините одбрани ги материјализираа Новежанките и од 19:19 се „одлепија“ на 26:21, предност што се покажа како клучна за конечниот триумф.

Холандија се обиде во последните десет минути, стигна до гол негатива, но не и до целосен пресврт.

Нора Мерк ја предводеше Норвешка до титулата со 12 голови, додека на спортивната страна најефикасна беше Снелдер со шест голови.

Бронзата ја освои Франција со победата над Данска 25:22.