Убедлива игра и победа на ЖРК Вардар против Астраханочка во последниот меч на домашен терен во групите во Лигата на шампиони за оваа сезона. Македонскиот женски ракометен првак го декласира рускиот со 39:25 во четвртото коло во групата Б за одбрана на првото место на табелата и осигурување на место во наредната фаза на две кола до крајот на тековната. „Експлодира“ Јованка Радичевиќ која постигна 9 гола, најефикасна кај составот од Астрахан беше Кожокар со седум погодоци. На клупата на вардарки дебитира Давид Дејвис, во составот се вратија Лекиќ и Кликовац по повредите поради што беа во аут во изминатиот период.

Во мечот во СЦ „Јане Сандански“ овојпат имаше само една екипа. Сè што се случуваше во 60-те минути на теренот беше во знак на „црвено-црните“ девојки. Неизвесност изостана бидејќи за неа е потребен и противник, кој и покрај предупредувањата за капацитет што го поседуваат Русинките, сепак, беа невидливи денеска. ЖРК Вардар „нагази“ од почеток, наметна силно темпо што гостинските ракометарки не можеа да го следат, до израз дојде квалитетот за безбедно движење од прва до последна минута. Печат на триумфот стави Амандин Лејно чија фрлена топка за контра заврши во противничката мрежа.

Вардарки во наредното коло на 13 ноември ќе ѝгостуваат на екипата на Ференцварош која однесе бод од Скопје во првото коло. И покрај, и математички, обезбедниот пласман во следната фаза, мечот во Унгарија не е без значење бидејќи од исходот ќе зависи дали и колку бодови ќе пренесат „црвено-црните“ во новоформираната група. Потоа, на 19 ноември, ќе следува и натпревар во Германија против Лајпциг што беше „разнесен“ во Скопје со 41:24.

ЖРК Вардар – Астраханочка 39:25 (18:13)

СЦ „Јане Сандански“ во Скопје. Гледачи: 3.500. Судии: Вања Антиќ и Јелена Јаковљевиќ од Србија

ЖРК Вардар: Лејно, Песоа, Радичевиќ 9, Кликовац 1, Херем 5, Мавсар 2, Дамњановиќ 1, Алтхаус 4, Илјина /, Пенезиќ 5, Човиќ 3, Лакрабер 1,  Хмирова 4, Лекиќ 3, Ристовска 1. Тренер: Давид Дејвис

Седмерци: 4/4. Исклучувања: /.

Астраханочка: Ваганова, Трусова, Сисенова 2, Постнова 5, Сорокина /, Иванова 1, Сабирова 4, Левша /, Видрина /, Чигиринова 2, Клименко /, Шичкина 2, Игнатович 1, Зеленкова 1, Кожокар 7, Јемелјаненка /. Тренер: Михаил Серегин.

Седмерци: 4/4. Исклучувања: 4 минути.