Ракометарите на Вардар имаат една желба за вечерашниот настап во хрватскиот главен град. Посакуваат победа против ППД Загреб во петтото коло во групата во Лигата на шампиони за продолжување на импресивната низа во натпреварувањето што трае 240 минути или вкупни 12 меча во новата сезона со оние во СЕХА лигата.
„Во иста ситуација сме како и лани. И тогаш заминавме со четири победи кај тимот на Колдинг кој немаше ниту еден бод дотогаш, а ние загубивме. Се надевам дека лекцијата е научена“, смета Раул Гонзалез, тренер на Вардар.
Вардар и Загреб по вторпат ќе играат во оваа сезона по 32:31 за „црвено-црните“ во Скопје минатиот месец во регионалната лига. Ако, пак, се земат предвид само меѓусебните дуели во Европа, ова ќе биде нивна седма. Четири од претходните шест беа во Лигата на шампиони во 2002 година и во 2007 година и две во полуфиналето во КПК во 2005 година.
Традицијата е на страна на хрватскиот првак. Загреб има четири победи, реми и пораз, но претстојниот меч го чека во турбулентен период за клубот. Среде недела се раздели со тренерот Веселин Вујовиќ, на негово место е поставен Силвио Ивандија кој ќе се обиде да најде начин за психолошко подигнување на играчите по четирите порази досега. Колку тоа може да биде добар или лош момент по вардарци, Гонзалез со свое видување пришто нагласува потреба од крајна внимателност. Еве и зошто така смета Шпанецот.
„Кога една екипа има нов тренер, тогаш играчите сакаат да се наметнат и тој да се покаже. Згора на тоа, Загреб е домаќин и како секогаш игра пред полни трибини. Треба да бидеме претпазливи. Имаме мал притисок бидејќи сме фаворити во овој дуел. Затоа мора целосно да се фокусираме и да работиме за победа“