Ракометарите на Вардар ремизираа во најсериозниот испит од досегашниот тек на Лигата на шампиони. Европскиот првак одигра 26:26 на гостувањето во Унгарија кај екипата на ПИК Сегед во меч од четвртото коло во групата А, но останува на чело на табелата до завршување на дуелот меѓу Барселона и Нант на Кире Лазаров што се игра вечерва.
„Црвено-црните“ можеа и до победа што ќе беше петта во низа над ривалот од Сегед доколку Тимур Дибиров ја реализира контрата на 15 секунди до крајот. Меѓутоа тенка беше линијата и до пораз со оглед дека во завршните 120 секунди се влезе со 26:24 за домашните. Вардарци, сепак, успеаја да го запрат унгарскиот состав со црвста игра во одбрана и со головите на Борозан и Македа да ја поништат негативата.
Конечниот исход на средбата е огледало на сиот нејзин тек што мина во, речиси, резултатски егал. ПИК Сегед најчесто беше во водство, а притоа не успеа да направи посериозно бегство од два до три гола разлика. Вардарци имаа издание со голем број на технички грешки и нереализирани напади, но, за нивна среќа, се враќаа во чекор со противникот. Во првото полувреме заостануваа и три гола (13:10) на што возвратија со низа од три гола, во второто полувреме израмнија само двапати (20:20 и 21:21) и, се разбира, во последната минута по што резултатот остана непроменет иако ПИК Сегед го имаше завршниот напад во кој неговите играчи беа одлично затворени за осигурување на бодот.
Денис Бунтиќ беше најефикасен ракометар кај унгарскиот претставник со пет гола, вардарецот Вуко Борозан со осум реализации го понесе епитетот прв стрелец во „Вароши Спортзамок“ во Сегедин.
Наредната сабота (17,30 ч.) во СЦ „Јане Сандански“ гостува моќната Барселона во дербито на петтото коло во ЛШ.
ПИК Сегед – Вардар 26:26 (14:13)
Сала: „Вароши Спортзамок“ во Сегедин. Гледачи: 3,200. Судии: Андреј Гушко и Шархеи Репкин (двајцата од Белорусија).
ПИК Сегед: Сиера Мендеш (11 одбрани), Шего, Калман 3, Бодо 2, Сигурмансон 2, Горбок 1, Гонсалвеш, Фекете, Зубаи, Балог 2, Скубе 4, Блажевиќ, Габер 3, Шоштариќ 2, Бунтиќ 5, Житников 2. Тренер: Хуан Карлос Пастор Гомез.
Седмерци: 3/4. Исклучувања: 8 минути.
Вардар: Штербик (13 одбрани, 1 седмерец), Милиќ, Стоилов, Недановски, Кристопанс 2, Фереира Мораеш 1, Македа 2, Абутовиќ, Кањелјас 1, Циндриќ 7, Чупиќ 3, Дибиров 1, Шишкарев 1, Борозан 8, Војводиќ, Марсениќ. Тренер: Раул Гонзалез.
Седмерци: 3/5. Исклучувања: 4 минути.