Индивидуална класа, висок процент на реализација на нападите и повеќе алтернативи од клупата беа пресудните елементи во триумфот на ЖРК Вардар кај Тирингер со 29:21 во второто коло од групата Ц во ракометната Лига на шампиони. Бундеслигашот имаше или си обезбеди премалку шанси и остана немоќен против македонскиот првак.
Ракометен дијалог на теренот во „Ведигсбургхале“ во Ерфурт се водеше само во воведниот дел на средбата. Се останато беше ракометен монолог во продукција на „црвено-црните“ девојки кои не дозволија сензација налик на онаа од 2014 година кога Тирингер славеше со 21:20. Однос на силите како учители наспроти ученици пришто ниту поддршката од трибините не беше ветар во грб за домашниот тим.
„Почнавме страшно мотивирано, но набрзо паднавме поради пропушените прилики. Сакавме да се обидеме да воспоставиме баланс во второто полувреме што, сепак, беше невозожно бидејќи Андреа Лекиќ одлично го предводеше Вардар“, призна Херберт Милер, тренер на Тирингер.
Тирингер одржуваше резултатски чекор до 6:6 во 10. минута. Во наредните шест вардарки направија серија од 6:0 и го решија натпреварот. Додека германскиот состав тешко успеваше да најде пукнатина во „црвено-црната“ одбрана, „црвено-црниот“ напад беше немилосреден и казнуваше во, речиси, секоја прилика и заслужено ги понесе бодовите на пат кон дома.
Андреа Пенезиќ со седум гола беше најефикасна на средбата, по пет додадоа Александра Лакрабер и Андреа Лекиќ. Свој придонес во убедливиот триумф имше и голманскиот двоец Амандин Лејно и Ина Суслина кои запишаа осум, односно, седум интервенции.
ЖРК Вардар наредниот викенд ќе има ново гостување во Лигата на шампиони. Следен предизвик е норвешки Ларвик (21 октомври).
Тирингер – ЖРК Вардар 21:29 (11:19)
Сала: „Ведигсбургхале“ во Ерфурт. Гледачи: 1,500. Судии: Марек Барановски и Богдан Лемановиц (двајцата од Полска).
Тирингер: Краузе (8 одбрани), Екерле (2 одбрани), Шефкнехт 6, Ланг 1, Мацуко, Шмелцер, Нидервасер 2, Лузумова 8, Јакубисова 4, Волболд, Редер, Хубер. Тренер: Херберт Милер.
Седмерци: 3/6. Исклучувања: 8 минути.
ЖРК Вардар: Лејно (8 одбрани), Суслина (7 одбрани), Радичевиќ 7, Кликовац, Саздовска 1, Кузнецова 2, Бајрамоска, Лазович 2, Пенезиќ 5, Чанадија, Лакрабер 5, Хмирова 1, Цвијиќ 1, Лекиќ 5, Петровиќ, Ристовска. Тренер: Ирина Дибирова.
Седмерци: 4/4. Исклучувања: 10 минути.
Лига на шампиони, група Ц, 2 коло
Тирингер – ЖРК Вардар 21:29
Ференцварош – Ларвик 37:33
Табела: ЖРК Вардар 4, Ференцварош 2, Тирингер 2, Ларвик 0.
Идно коло: Ларвик – ЖРК Вардар (21 октомври), Тирингер – Ференцварош (22 октомври)