Новогодишен концерт во салата „Борис Трајковски“ е причина за привремена преселба на машката ракометна репрезентација во Автокоманда. Селекторот Раул Гонзалез ги одржа денешните тренинзи во домот на Металург, а на истата локација ќе работи и утре бидејќи теренот во националната арена е зафатен со поставување на сцена за утрешното гостување (сабота) на Аца Лукас, Пеџа Меденица и Милица Павловиќ.
Ракометарите добија слободно за недела, за понеделник и за вторник и со подготовки за претстојното Светско првенство во Германија (10 – 27 јануари) ќе продолжат на 2 јануари (среда). На 4 и на 5 јануари се планирани и два тест меча со селекцијата на Србија и три дена подоцна (8 јануари), националниот тим ќе отпатува за Минхен каде ќе настапи во групата Б заедно со Шпанија, Хрватска, Исланд, Бахреин и со Јапонија.