Даинис Кристопанс и официјално е нов ракометар на Вардар. Летонскиот репрезентативец и македонскиот шампион потпишаа договор за тригодишна соработка. Кристопанс ќе пристигне во Скопје по завршување на сезоната во која ги брани боите на Мешков Брест од Белорусија. Во „црвено-црниот“ табор ќе биде замена за Алекс Душебаев кој на лето се сели во Кјелце.

„Минав две извонредни сезони во перспективниот и квалитетен тем на Мешков Брест. Време е за нов предизвик во мојата кариера. Имаше неколку заинтересирани екипи од топ ранг од Унгарија, Германија, Шпанија и Белорусија, но мојата одлука падна на Вардар кој ми понуди најдобри услови за унапредување како професионалец. Според мене, тоа е еден од најамбициозните клубови во светот во моментот“, стои во изјава на Кристопанс на интернет страницата на Вардар.

Кристопанс е вистинските џин меѓу ракометарите. Со своите, кошаркарски, 213 сантиметри е највисок играч во Лигата на шампиони. Лани ја имаше најдобрата сезона во натпреварувањето со 62 погодока. Оваа сезона во ЛШ има 23 гола на пет средби, два помалку од СЕХА лигата во која одигра и два меча повеќе.