Металург загуби од Мотор Запорожје со 22:30 во деветтото коло од групата Д во ракометната Лига на шампиони. Украинскиот состав ја оправда фаворитската улога во ВИП арената „Борис Трајковски“ оставајќи го македонскиот вицепрвак без трошка надеж за победничко збогување со своите навивачи на европската сцена.
Гостите од Украина уште од почеток дадоа до знаење дека се дојдени за што порано обезбедување на бодовите, а потоа и нивно рутинско одработување. Таквото сценарио и го реализираа. Резултатски се одлепија во воведот за 1:5 и не дозволија серија или постепено враќање на металурзи.
На десетминутната пауза заминаа со позитива од пет гола (11:16) што без особени проблеми ја надградуваа во продолжението. Напомош на Металург не беше ниту солидниот Арсиќ на голот со 11 интервенции од причина што и Мотор го имаше Терехов меѓу стативите кој натпреварот го заврши со 13 одбранети удари.
Најефиксен ракометар меѓу домашните беше Дарко Димитриевски со пет гола, еден повеќе од Халил Јагањац. Пет гола за победничката екипа постигна Артем Козакевич, но имаше поддршка од речиси сите останати колеги. Во листата на стрелци, освен двајцата голмани, не се впишаа само Комок и Целишчев.
Во Д конкуренцијата денеска играа и Чеховски Медведи и Спортинг Лисабон. Рускиот претставник славеше со 30:27. Лидер на табелата е тимот на Монпелје кој утре попладне е домаќин на Бешикташ на Филип Лазаров и Немања Прибак.
Металург во последното коло на 2 декември ќе гостува во Португалија на екипата на Спортинг Лисабон.
Металург – Мотор Запорожје 22:30 (11:16)
ВИП арена „Борис Трајковски“ во Скопје. Гледачи: 1.500. Судии: Јири Опава и Павел Валек (двајцата од Чешка).
Металург: Томовски (2 одбрани), Арсиќ (11 одбрани), Даниловски, Петров 2, Јагањац 4, Токиќ, Серафимов, Кузмановски 2, Илиќ 1, Анѓелиќ 2, Велковски, Пешевски 3, Палевски, Гуглета 3, Димитриевски 5, Арсеновски. Тренер Александар Јовиќ.
Седмерци: 3/7. Исклучувања: 4 минути.
Мотор Запорожје: Киреев (4 одбрани), Терехов (13 одбрани), Буиненко 2, Бабичев 3, Маласинскас 3, Шевелев 1, Денисов 2, Дорошчук 1, Козакевич 5, Пацковски 2, Жук 2, Шинкел 4, Комок, Целишчев, Шелменко 3, Пуховски 2. Тренер: Патрик Ромбел.
Седмерци: 4/6. Исклучувања: 10 минути.