Раководството на аеродромот во Сиднеј денеска соопшти дека е согласно на понуда од 17,5 милијарди долари на австралиски инвестициски конзорциум за преземање на менаџирањето што доаѓа по само неколку дена од повторното делумно воспоставување на меѓународни патувања.
Одборот на директори на аеродромот едногласно ја одобри продажбата на Сиднеј Авиејшн Алијанс (Sydney Aviation Alliance), конзорциум од инфраструктурни инвеститори и австралиски пензиски фондови, и им препорача акционерите да гласаат „за“.
Алијансата понуди 8,75 долари по акција или 23,6 милијарди австралиски долари (17,5 милијарди американски долари), откако сите понуди во последните месеци беа одбиени како премногу ниски.
Денешното соопштение е кулминација на повеќемесечниот ангажман меѓу сите страни. Управниот одбор на аеродромот во Сиднеј верува дека резултатот ја одразува соодветната долгорочна вредност за аеродромот, се вели во изјавата на претседателот на аеродромот во Сиднеј, Дејвид Гонски.
Соопштението доаѓа по делумното повторно отворање на меѓународната граница на Австралија, речиси 600 дена од почетокот на едно од најтешките затворања на границите во светот поради пандемијата на ковид-19.
Продажбата на аеродромот подлежи на одредени услови, вклучително и независна експертска проценка. Се очекува акционерите да го разгледаат договорот на состанок во првиот квартал на 2022 година, а за одобрување е потребно мнозинство од 75 проценти.