Премиерот Зоран Заев, заедно со албанскиот колега Еди Рама денеска беше во посета на општината Пустец.
Во македонската делегација со Заев беа министерот за внатрешни работи, Оливер Спасовски, министерката за образование, Рената Дескоска и министeрот за дијаспора, Едмонд Адеми.
Албанскиот премиер беше придружуван од Дитмир Бушати, министер за Европа и за надворешни работи, Линдита Никола, министерката за образование и Пандели Мајко, министер за дијаспора.
Видео и фото материјалот се официјални снимки на Владата на Република Македонија
Двајцата премиери прво разговараа со раководителите, наставници и ученици во едно од училиштата во општината, С.У. „Трајан Горѓиовски и Митре Колевски“, се вели во соопштението од Владата.
Заев донираше книги и работни материјали за учениците.
Тие имаа заеднички состанок со преставници на општината Пустец, заменик градоначалникот и советниците, кои ги објаснија приоритетите за коишто очекуваат поддршка, меѓу кои е и реновирање на училиштето.
„Присуството на двајцата први луѓе на извршната власт во Македонија и во Албанија, тука во Пустец е голема симболика за унапредувањето на односите меѓу двете земји“- изјави Заев на состанокот. Toj му се заблагодари на Рама за грижата што ја покажува за граѓаните со македонско етничко потекло во Албанија.
Потоа премиерите Заев и Рама имаа заеднички состанок со претставници на општината Пустец. Тие ги објаснија приоритетите за коишто очекуваат поддршка. Еден од нив е и реновирање на училиштето, за што премиерот Рама се обврза дека ќе биде реновирано, како и дека општината ќе добие поддршка во комуналните проекти и проектите за локален развој што беа посочени на средбата.
На состанокот со локалните власти во Пустец, премиерот Заев најави дека и Македонија ќе помогне во решавањето на прашањата што се од важност за жителите со македонско етничко потекло во Албанија.
Премиерот Заев и премиерот Рама заедно запалија и свеќи во црквата Свети Архангел Михаил во општина Пустец, каде премиерот Заев остави лична донација.
Премиерот Заев, во рамки на работната посета на Република Албанија, синоќа се сретна и со преставници на сите здруженија на жители со македонско етничко потекло во Албанија од Преспа, Корча и од Голо Брдо, како и со претставници од политичката партија Македонска алијанса за европска интеграција.
На состанокот се разговараше за унапредување на употребата на македонскиот јазик во местата каде што живеат граѓани од македонско етничко потекло, како и за начините на коишто може да се унапредат културните, образовните, инфраструктурните потреби.
Инаку, Владите на Република Македонија и на Република Албанија вчера во албанскиот град Подградец одржаа прва заедничка седница, од каде што порачаа дека двете земји очекуваат наредната 2018 година да ги започнат преговорите за зачленување во Европската унија, да го искористат моментот на позитивна клима во регионот за напредок во тој процес.
Заев најави одржување меѓувладина седница наредната година во Охрид или Струга.