Откако вчера Кривичниот совет на Основниот суд во Скопје го прифати барањето на СЈО и му определи 30-дневен притвор на градоначалникот на општина Пустец во Албанија, Едмонд Темелко, по него е распишана централна и меѓународна потерница, објави Фокус повикувајќи се на информација од Судот.
Обвинителката Ленче Ристоска денеска појасни дека побарале притвор за Темелко бидејќи имале сознанија дека ја преминувал границата и ја напуштал државата.
Дури и да има жалба, решението за притвор е извршно.
Тој е обвинет во случајот Титаник со евентуални изборни нерегуларности на локалните избори во 2013 година. Неофицијално се дознава дека и покрај тоа што имал забрана да не ја напушта Македонија, Темелко во изминатиот период неколкупати ја минал границата користејќи албански исправи за идентификација. Во споменатиот судски случај на Специјалното обвинителство се обвинети и неколку други политичари. Никола Груевски, Гордана Јанкуловска, Миле Јанакиески, Мартин Протуѓер и Кирил Божиновски.
По победата на изборите одржани во 2007 година, Темелко станал градоначалник на Општина Пустец во областа Мала Преспа во Албанија. Тој во февруари минатата година беше уапсен поради сомневање за поврзаност со изборни измами од случајот „Титаник“.