Kомисијата за заразни болести утре ќе одржи седница на кој ќе ја разгледа актуелната состојба со ковид-19. Министерот за здравство Беким Сали вели дека состанокот се свикува по пауза од два месецa, со цел да се направи анализа на севкупната состојба поради порастот на заболени од коронавирус.
„Во Европа веќе почна да се зголемува бројот на новозаразени од ковид-19, и кај нас забележуваме благ пораст на нови случаи. Комисијата за заразни болести има закажано состанок за предвремена анализа, можеби сè уште не е време, односно не е алармантно, но за утре е закажана првата седница по пауза од два месеца, што укажува дека нешто веќе се случува и кај нас. Ги повикувам сите граѓани да бидат внимателни и да ги запазат оние трите златни чекори за заштита од инфекција со ковид-19, одржување хигиена, носење маска во затворена просторија, сè уште како мерка не сме ја донеле, но следно би било тоа, и одржување на личната хигиена која што е многу значајна за заштита од ковид-19“, изјави минстерот Сали, кој беше на крводарителска акција во Куманово.
На новинарско прашањето дали на утрешната седница комисијата ќе донесе рестриктивни мерки, министерот кажа тоа ќе зависи од неделните ализи.
„Зависно од неделните анализи што ќе кажат, доколку дојдеме до нив, тоа знаете е со градација, скалесто, како што се зголемува бројот на новозаразени, зависно во кој период и кои ни се целните групи, така носиме и одлуки за заштита односно рестриктивни мерки, јас посакувам да не се вратиме на старото, но мора да бидеме спремни, внимателни и да правиме навремени анализи заедно со експертите и Институтот за јавно здравје“, кажа Сали.
Согласно податоците од Институтот за јавно здравје, Министерството за здравство информира дека во последните 24 часа направени се 1.101 тестови, а регистрирани се 168 нови случаи на КОВИД-19: Скопје – 91, Битола – 12, Кавадарци, Тетово и Охрид – по 10, Велес – 9, Прилеп – 5, Штип и Струмица – по 3, Куманово, Гостивар, Струга, Ресен и Крушево – по 2, Кочани, Неготино, Радовиш, Крива Паланка и Дебар – по 1.
Од вкупниот број на позитивни (168), регистрирани се 28 реинфекции.
Регистрирани сe 90 оздравени пациенти од: Скопје – 59, Куманово и Битола – по 7, Охрид – 5, Кавадарци и Штип – по 3, Прилеп, Тетово, Велес, Гостивар, Кичево и Ресен– по 1.
Во текот на изминатите 24 часа не е пријавено ниту едно починато лице. Согласно Регистарот на умрени лица со дијагноза КОВИД-19 од Мој Термин не се регистрирани починати лица.
Досега во земјата се направени вкупно 2.079.613 тестирања на КОВИД-19. Вкупната бројка на КОВИД-дијагностицирани лица во нашата земја од почетокот на епидемијата изнесува 313.708, бројот на оздравени пациенти е 303.738, на починати е 9.322, а бројот на активни случаи изнесува 648.