Двата прислушувани разговори, од кои едниот е помеѓу поранешниот шеф на УБК Сашо Мијалков и лидерот на ДПА Мендух Тачи во кој се слуша како се договараат за гласање во ДИК, ќе бидат дел од судската постапка за случајот на СЈО „Титаник 2“.
Како што потврдуваат од Апелациониот суд, судиите како и во претходните случаи одлучиле да го преиначат решението на Кривичниот суд кој ги одби бомбите и да дозволат прислушуваните разговори да бидат слушнати во судница.
Покрај Мијалков и Тачи во „Титаник 2“ се обвинети и поранешниот член на ДИК Бедредин Ибраими и Сашо Срцев како и петмина судии од Управниот суд.
Тие се товарат за злоупотреба на службената положба и овластување поврзано со изборни нерегуларности. Апелација треба да одлучува и за жалбите на СЈО на одлуките на Кривичен бомбите да не бидат доказ и во предметите „Тортура“ и „Титаник“.
На јавна седница вчера СЈО ја образложуваше жалбата зошто бомбите треба да бидат доказ во предметот „Титаник 2“. Станува збор за два разговори од кои од едниот помеѓу поранешниот шеф на УБК, Сашо Мијалков и Мендух Тачи се слуша како се договараат за гласање по однос на приговори на изборите во ДИК.
Обвинителката Фатиме Фетаи побара Апелација да се води од досегашната пракса со која бомбите беа прифатени како доказ. Одбраната на обвинетите и обвинетите Мијалков, Тачи, поранешните членови на ДИК Бедредин Ибраими и Сашо Срцев како и петтемина судии од Управниот суд не дојдоа на јавната седница.