Новак Ѓоковиќ не крие разочарување по предаденото четврт-финале на Вимблдон на Чехот Томаш Бердих. Изрази жалење за начинот на кој бил принуден да заврши со настапи на третиот гренслем во сезоната и најави можност за завршување на кариерата за да може целосно да се рехабилитира од повредата на десниот лакт што, како што вели, го измачува веќе година ипол.
„Година ипол имам проблеми со лактот. Се обидов да бидам во состојба да го одиграм мечот со Бердих. Болките беа подносливи во првите 30 минути, но ниту масажите ниту лековите помогнаа. Најголеми болки чувствував при сервисот и форхендот. Немаше смисла да продолжам“, рече Ѓоковиќ.
Српскиот тенисер реши да се повлече од мечот при водство на Чехот со 7:6 и 2:0. Не му беше од корист ниту медицинскиот там-аут што го побара во паузата меѓу двата сета, а по мечот најави дека тука некаде, можеби, ќе ја заврши сезоната и ќе стори се што е во негова можност да избегне операција. Но, дефинитивната одлука, како што најави, ќе следи по консултации со компетентни лица.
„Не сум специјалист ниту ортопед. Ќе разговарам, ќе се консултирам како што правев и во изминатите година ипол да се обидеме да најдеме најдобро решение за проблемот, решение што ќе биде долгорочно. Опцијата на краток рок е повеќе да одморам. Ќе видиме. Ако некој се чувствува лошо по ова, тоа сум јас. Но, барем се обидов“, дополни Ѓоковиќ.