Предлогот за разрешување на републичкиот јавен обвинител, Марко Зврлевски на 3 јули ќе се најде на дневен ред на Собранието. Точката за разрешувањето на Зврлевски е последна односно 30 по ред на седницата.
„Предлогот за разрешување на Марко Зврлевски од функцијата јавен обвинител на Република Македонија, пред истекот на мандатот, е поради незаконито, ненавремено и недоволно стручно вршење на функцијата. Исто така, во своето однесување и дејствување именуваниот покажа дека не е способен за извршување на функцијата, поради неподнесување барање за поведување кривична постапка за случаи предвидени со закон и поради нарушување на угледот на функцијата“, пишува во образложението на Советот на јавни обвинители кое го доставиле до Владата.
Владата на седница во петокот минатата недела, ја донесе одлуката за разрешување на Зврлевски, а претходно Советот на јавни обвинители го прифати предлогот на Владата за разрешување на актуелниот републички јавен обвинител.
За да се разреши Зврлевски потребно е мнозинство од 61 пратеник.