Седницата за разрешување на Републичкиот јавен обвинител, Марко Зврлевски од 11 часот е презакажана за 15 часот. Неофицијално причината за презакажувањето на седницата е тоа што немало кворум во салата.
Денеска, по 12 продолженија на расправата за Зврлевски, пратениците требаше да гласаат.
Иако според бројот на пријавените дискутанти и оние за реплика можеше да се очекува маратнонската расправа да продолжи и во следните денови, пресврт се случи откако пратениците од опозицијата, кои и во изминатите 12 дена расправа само дебатираа и меѓусебно си реплицираа, се откажаа од дебата и ја напуштија пленарната сала, а претседателот на Собранието Талат Џафери ја затвори расправата и предлогот го стави на гласање, по што ја прекина седницата.
Причина за ова беше неприфаќањето на мислењето на Државната комисија за спречување корупција дека разрешувањето на Зврлевски е незаконско.
„Нашата цел е постигната, ние од самиот старт знаевме дека ова тесно мнозинство е одлучено да го разреши Зврлевски и немавме никаква дилема дека тоа е донесена политичка и партиска одлука од штабот на СДСМ, нити во одреден момент мислевме дека со дискусија ќе смениме мислење на овие 62 пратеници. Но во исто време целата јавност дозна дека СДСМ е спремен грубо, дрско да крши закон и да крши најзначајно изборен закон и во оваа постапка, во Собранието, но и во сите други постапки во оваа држава“, рече пратеникот Илија Димовски од собраниската говорница.