Ѓоковиќ против Раониќ, Монфис и Тим во „Лендл“ групата, Мареј против Вавринка, Нишикори и Чилиќ во групата „Мекинро“ е епилогот од ждрепката за завршниот тениски Мастерс во Лондон. Настанот во „О2 арена“ почнува во недела, на 13 ноември. Бранител на титулата е Новаќ Ѓоковиќ, како број еден светски рекет на турнирот ќе учествува Енди Мареј. Доколку српскиот тенисер успее да се одржи на тронот, а притоа ги добие и сите три меча во групата, тогаш ќе направи кам-бек на врвот на АТП листата.
„Ждрепката е добра иако конкуренцијата не е наивна. Сите, воглавно, одигравме многу меѓусебни мечеви во сезоната. Можеби во тој поглед заостанува Тим, но во секој случај ќе биде интересно“, рече Монфис, еден од дебитантите на лондонскиот Мастерс.
Со статус дебитант во Лондон ќе патува и Доминик Тим. Австриецот најпрво му се заблагодари на Милош Раониќ за победата над Цонга што значеше елиминација на Французинот од место во „О2 арена“ по што даде и кус коментар за групите.
„Нашата група е многу интересна. Секогаш постои голем притисок кога играте против најдобрите, особено на крајот на сезоната. Она во што верувам, сепак, е фактот дека публикатаќе има во што да ужива“, порача Тим.
Стен Вавринка своите размислувања по ждрепката во добар дел ги насочи кон Енди Мареј, новиот лидер на светскиот тенис.
„Неверојатно е што направи Енди во текот на оваа година, но и во последните десет години. Тој е неверојатно борбен човек. Освои доста, пред се, во последно време и мислам дека заслужено е таму каде што е во моментот. Убеден сум дека ќе ужива пред својата публика во Лондон како број еден. Нè очекува интересен турнир“, истакна Швајцарецот.
Марин Чилиќ, кој со победата над Ѓоковиќ во четвртфиналето во Париз, му расчисти пат на Енди Мареј изрази задоволство што ќе има прилика да игра против Британецот во Лондон.
„Зад мене се неколку интересни месеци, пред се последните две-три недели. Задоволство ми е што сум дел од оваа група на тенисери. Уживам во тој факт. Групата, секако, е тешка, но е привлечна и напорна. Особено кога ќе играм против Мареј, новиот број еден. Се надевам дека барем некој во арената ќе навива за мене“, во шега изјави Чилиќ.