Зинедин Зидан е пример како се станува еден од најтрофејните тренери во историјата на еден од најтрофејните клубови. Неговото именување за наследник на Рафаел Бенитез на клупата на Реал Мадрид, пред 18 месеци, беше дочекано со спектицизам од фановите и јавноста. Фудбалските квалитети што ги поседуваше не беа спорни за никој, забелешките се однесуваа на отсуството на искуство во водење на така големи екипи каква е „кралската“ од „Сантијаго Бернабеу“.
Осумнаесет месеци подоцна Французинот ги затвори устите и на најголемите критичари. Под негово водство во вторникот во Скопје, Реал Мадрид ја освои шестата титула (две во Лигата на шампиони, две во европските Суперкуп натпревари и по една во Примера и на Светското клупско првенство) што го прават четврти менаџер по бројот на освоени трофеи во 115 годишната историја на клубот.
Триумфот над Манчестер јунајтед на „Телеком арена“ беше доволна причина за претседателот на Реал М., Флорентино Перез да го „врзе“ Зидан со нов договор по враќање од Македонија. Планот што веројатно му дојде во ВИП ложата на Северната трибина, го преслика и во дело. Сакајќи да обезбеди иднина во водењето на екипата, Перез му понуди нов тригодишен договор што одличниот фудбалер за врска од минатото го потпиша со задоволство.
Покрај емотивното задоволствот, Зидан доби и прилично материјално на што упатува сумата што ја објави „Ас“. Платата на Французинот во иднина ќе изнесува осум милиони евра по сезона, а во Скопје допатува како тренер кој заработува „само“ 4,35 милиони. Тоа доволно говори за големината што ја создаде во очите на Перез за година ипол работа со „галактикоси“, но и како формален доказ дека неговите услуги ги сметаат на подолг рок на „Бернабеу“.