Речиси 90 отсто од населението во третата најнаселена кинеска провинција Хенан е заразено со коронавирус, соопшти директорот на здравствената комисија за таа централна провинција, Кан Кванченг.
Тој на прес-конференција рече дека од 6 јануари стапката на инфекција во провинцијата Хенан е 89 отсто.
Во Хенан живеат 99,4 милиони луѓе, што значи дека околу 88,5 милиони сега веројатно се заразени.
Бројките од провинцијата Хенан се во спротивност со податоците за Ковид кои ги објавува владата во Пекинг.
Според податоците од Пекинг, од укинувањето на политиката за нулта ковид во Кина во декември минатата година, се заразиле само 120.000 луѓе, додека 30 лица починале.
Кина на 8 јануари ги олесни ограничувањата за патувања во земјата и во странство иако ширум земјата се шири нов бран инфекции.
Претставници на владите на земјите-членки на ЕУ на 4 јануари издадоа препорака до земјите-членки дека патниците кои доаѓаат од Кина за ЕУ треба да имаат негативен тест за коронавирус пред да влезат во авионот.