Во недела, на 23 април, жителите на Гевгелија на референдум ќе одлучувааат дали се за или против отворање рудници на територијата на општината. Најавите се дека меѓународни компании од Канада во изминатите четири години добиле концесии од Владата за детални геолошки истражувања на две локации во Општина Гевгелија, односно на падините на планината Кожуф.
Активистите од граѓанското здружение „Спас за нас“ од Гевгелија стравуваат дека доколку рудниците започнат со работа на планината ќе се вади руда со експлозив и голема механизација, а ќе се користи и цијанид за златото да биде одвоено.
Под истата закана се и жителитe на Валандово каде што компанијата „Сардич“ доби 35 годишна концесија и треба да започне со вадење бакар. И тамошните активисти остро се противат на овие решенија и најавуваат протести, но не се исклучува и можноста за референдум по примерот на гевгеличани.