Градоначалникот на Валандово, Николче Чурлиновски, за НОВА ТВ вели дека одлуката за запирање на Референдум за рудникот Казандол ја донел за да се заштити себе си, општината и Советот.
Тој изјави дека го почитува гласот на граѓаните за или против отворање на рудникот, но за да донесе било каква одлука ќе мора најпрво да се расчистат законските недоумици.
„Во меѓувреме ќе се обратам до Уставниот суд и до Министерството за локална самоуправа (инспекторат) за толкување на законот – дали може да се распише референдум за рудниците кои не се во наша надлежност, туку во надлежност на Владата“ , изјави градоначалникот за НОВА ТВ.
Чурлиновски вели дека се одлучил на овој чекор, со оглед на лошото искуство на градоначалничката од Богданци, Анастасија Олумчева, која доби кривична пријава од инвеститорот „Сардич МЦ“ за незаконито постапување и одлучување за прашања кои не се во надлежност на локалната власт.
Градоначалникот тврди дека одлуката за запирање на референдумот, не значи дека тој е против изјаснување на граѓаните, туку уште еднаш нагласи дека тоа го сторил во интерес на општинската власт.
За разлика од Чурлиновски, од иницијативата „Спас за Валандово“, велат дека не е вистина дека општината не смее да распише референдум.
„Според Законот за локална самоуправа општината не е надлежна единствено за буџетот и кадровски решенија, за се друго има ингеренции. А, дали ќе има правна важност референдумот или ќе биде само консултативен тоа ќе одлучи централната власт“, вели Роберт Марков од „Спас за Валандово“.
Градоначалникот Николче Чурлиновски, денеска соопшти дека ја запира одлуката на Советот за распишување на локален референдум ЗА или ПРОТИВ продолжување со работа на рудникот Казандол и други рударски комплекси на територијата на општината.
Во образложението градоначалникот наведува, „Советот не е надлежен за вакви одлуки“ и референдумот би бил „незаконско и неовластено трошење на градскиот буџет“.
Процесот на распишување на референдум во Валандово се одложува со месеци, откако два пати беше одбиена граѓанска иницијатива, а сега и иницијатива на советници.
Советниците информираат дека на следната седница на Советот одново ќе биде ставена на дневен ред точката за референдум и доколку по втор пат биде изгласана, тогаш градоначалникот нема да може да ја спречи одлуката.