Лидерот на СДСМ, Зоран Заев, кој до неодамна ја водеше македонската Влада би бил подобар иден премиер на државата во споредба со лидерот на ВМРО-ДПМНЕ, Христијан Мицкоски. Таков став имаат 32 отсто од испитаниците во најновото испитување на јавното мислење на агенцијата „Рејтинг“, додека 27 отсто „кренале рака“ за Мицкоски.
Како што може да се забележи од резултатите, граѓаните во значително повисок процент сметаат дека СДСМ може да обезбеди побрзо членство на државата во ЕУ и НАТО и да осигура поголема слобода и демократија. Исто така, за отсто повеќе граѓани сметаат дека СДСМ може да обезбеди подобар економски стандард од ВМРО-ДПМНЕ и исто толкав процент повеќе, дека може да обезбеди поголема независност на судството. Во однос на другите мерени области нема значајни разлики во одговорите, односно ниту една од партиите нема значајна предност.
Она што, сепак, треба да се забележи е дека процентот на граѓани кои се изјасниле дека ниту Влада предводена од Заев ниту од Мицкоски може да го намали криминалот и корупцијата е значително висок (44 отсто).
На прашањето „Кој е според Вас најважниот проблем со кој моментално се соочува Република Северна Македонија, граѓаните како три најважни проблеми ги посочуваат ниските плати и животниот стандард, криминалот и корупцијата и невработеноста. На четврто место следат високите трошоци за живот, а веднаш потоа иселувањето на луѓето.
Во однос на тоа која активност или мерка превземена од Владата на СДСМ во изминатите две и пол години граѓаните ја сметаат за најпозитивна, предничат покачувањето на платите, минималната и просечната, а потоа напредокот во Евроатланските интеграции. На трето место е зголемувањето на социјалната помош.
„Ако се има предвид дека Владата предводена од СДСМ во последните две и пол години интензивно работеше на решавање на спорот за името и на конечно деблокирање на процесите за евроатланското интегрирање на Македонија и дека земјата е веќе пред полноправно членство во НАТО и пред добивање датум за започнување на преговори за членство во ЕУ, овие одговори на граѓаните се сосема очекувани. Покачувањето на платите но и зголемувањето на социјалната помош, според оваа анкета станува се повидливо за граѓаните, како резултат од работењето на владата на СДСМ“, се вели во истражувањето на „Рејтинг“.
Во анкетата мнозинството граѓани негативно ја оценуваат работата на техничките министри кои ги постави ВМРО-ДПМНЕ во Владата. Високи 44 отсто рекле дека нивната работа ја оценуваат негативно, додека 35 отсто рекле дека ја оценуваат позитивно. Еден од пет испитаника не знае или нема мислење за работата на техничките министри на ВМРО-ДПМНЕ.
Анкетата била спроведена на примерок од 1.080 испитаници, во период од 18 до 29 јануари, со метод „интервју лице в лице“, а статистичката грешка изнесува од -3 до +3 отсто.