Судењето за случајот „Рекет“ се одложува за 27 јануари 2020 година, откако на денешното рочиште поранешната специјална јавна обвинителка Катица Јанева повторно се појави без своите адвокати Дељо Кадиев и Ирена Фрчковска.

Со оглед дека се работи за сериозен предмет со затворски притвор, судијката Васка Николовска-Масевска, ја повика Јанева да се произнесе дали ќе ангажира друг адвокат, бидејќи вакво одложување е неприфатливо.

„Јас си имам бранители. Само тоа можам да кажам“, изјави Јанева.
Судијката реагираше дека може да продолжи и со некој од адвокатските канцеларии на нејзините бранители или во краен случај со бранител по службена должност.
„Судот ќе побара од претседателот на Судот да постави бранител по службена должност, доколку одбраната на Јанева не се појави и во понеделник“, изјави судијката Николовски-Масевска.
Судијката, на почетокот на денешното рочиште, информираше дека до Судот на 21 јануари пристигнал поднесок од адвокатката Фрчковска дека поради болест не може да присуствува на денешното рочиште. Случајот се наоѓа во доказна постапка и на денешното рочиште требаше да сведочи поранешната специјална јавна обвинителка Лиле Стефанова, која ја води истрагата за случајот „Империја“.