Откако неодамна по десетти пат славеше во Монте Карло, шпанскиот тенисер Рафаел Надал, по десетти пат го освои и турнирот во Барселона. Поранешниот најдобар тенисер на светот во финалето го победи Австриецот Доминик Тием со 6:4, 6:1.
За Надал ова е вкупно 71 титула во кариерата, а во Барселона славеше и лани, потоа три пати од 2011 до 2013 година, и пет години по ред од 2005 до 2009 година.
Неговата доминација во Реал Клуб де Тенис Барселона ја прекинуваа сонародникот Фернандо Вердаско (2010) и Јапонецот Ки Нишикори (2014, 2015).
Шпанецот во Монте Карло стана првиот тенисер кој во „опен ерата“ на еден турнир победил десет пати, а сега тоа го повтори и во Барселона.
Следна прилика за „десетка“ наскоро ќе има и на Роланд Гарос каде исто така има девет победи.